ಬೆಂಗಳೂರು:ಆ-19: ಗ್ರಾಹಕರಿಗೆ ಗೊತ್ತಾಗದಂತೆ ಎಟಿಎಂ ಕೇಂದ್ರಗಳಲ್ಲಿ ಸ್ಕಿಮ್ಮಿಂಗ್ ಯಂತ್ರ ಅಳವಡಿಸಿ ಕ್ರೆಡಿಟ್ ಮತ್ತು ಡೆಬಿಟ್ ಕಾರ್ಡ್ಗಳ ಗೌಪ್ಯ ವಿವರ ಕದ್ದು ಖಾತೆಗೆ ಕನ್ನ ಹಾಕುತ್ತಿದ್ದ ಆನ್ಲೈನ್ ವಂಚಕರ ಕಣ್ಣೀಗ ಇ-ಕಾಮರ್ಸ್ ವೆಬ್ಸೈಟ್ಗಳ ಮೇಲೆ ಬಿದ್ದಿದೆ. ಎಲ್ಲೋ ಕುಳಿತು ವೆಬ್ಸೈಟ್ಗಳನ್ನು ಹ್ಯಾಕ್ ಮಾಡಿ ಮಾಹಿತಿ ಎಗರಿಸುವ ಇವರ ತಂತ್ರಗಾರಿಕೆಯಿಂದಾಗಿ ಡಿಜಿಟಲ್ ವ್ಯವಹಾರವೇ ಅತಂತ್ರವಾಗಲಾರಂಭಿಸಿದೆ.
ಹೆಚ್ಚುತ್ತಿರುವ ಇ ಕಾಮರ್ಸ್ ವೆಬ್ಸೈಟ್ ಹ್ಯಾಕಿಂಗ್ ಪ್ರಕರಣಗಳ ಬಗ್ಗೆ ಚಿತ್ತ ಹರಿಸಿರುವ ಕೇಂದ್ರ ಸರ್ಕಾರ ಅಧೀನದ ಭಾರತೀಯ ಕಂಪ್ಯೂಟರ್ ತುರ್ತು ಪ್ರತಿಕ್ರಿಯೆ ತಂಡ (ಸಿಇಆರ್ಟಿ-ಇನ್) ಗ್ರಾಹಕರು ಹಾಗೂ ವೆಬ್ಸೈಟ್ ಸಂಸ್ಥೆಗಳು ಎಚ್ಚರಿಕೆ ವಹಿಸಬೇಕೆಂದು ಎಚ್ಚರಿಕೆ ಕೊಟ್ಟಿದೆ. ಕಳೆದ 7 ತಿಂಗಳಲ್ಲಿ ಬೆಂಗಳೂರು ಕಮಿಷನರ್ ಕಚೇರಿ ಆವರಣದಲ್ಲಿರುವ ಸೈಬರ್ ಕ್ರೖೆಂ ಠಾಣೆಯೊಂದರಲ್ಲೇ ಆನ್ಲೈನ್ ವಂಚನೆ ಪ್ರಕರಣಗಳ ಸಂಖ್ಯೆ (ಆ.17) 6900ಕ್ಕೆ ಮುಟ್ಟಿದೆ. ಪ್ರತಿನಿತ್ಯ ಸರಾಸರಿ 985 ಕೇಸ್ಗಳು ದಾಖಲಾಗುತ್ತಿವೆ ಎಂದು ಸೈಬರ್ ಅಧಿಕಾರಿಗಳು ಮಾಹಿತಿ ಕೊಟ್ಟಿದ್ದಾರೆ.
ಫಿಶಿಂಗ್, ದುರ್ಬಲ ಪ್ಲಗಿನ್ ಹಾಗೂ ಸಾಮಾಜಿಕ ಇಂಜಿನಿಯರಿಂಗ್ ತಂತ್ರಗಾರಿಕೆ ಸೇರಿ ಹಲವು ರೀತಿಯಲ್ಲಿ ದೋಷಪೂರಿತ ಕೋಡ್ಗಳನ್ನು ಕಳುಹಿಸುವ ಮೂಲಕ ಹ್ಯಾಕರ್ಸ್ ಗಳು ವೆಬ್ಸೈಟ್ ಹ್ಯಾಕ್ ಮಾಡುತ್ತಿದ್ದಾರೆ. ಒಮ್ಮೆ ವೆಬ್ಸೈಟ್ ಹ್ಯಾಕ್ ಮಾಡಿದರೆ ನಿಮ್ಮ ಯೂಸರ್ ನೇಮ್ ಪಾಸ್ವರ್ಡ್, ಹೆಸರು, ಇ ಮೇಲ್ ವಿಳಾಸ, ಫೋನ್ ನಂಬರ್, ಕ್ರೆಡಿಟ್ ಕಾರ್ಡ್ ಮತ್ತು ಡೆಬಿಟ್ ಕಾರ್ಡ್ಗಳ ಗೌಪ್ಯ ವಿವರ ಹಾಗೂ ಬಿಲ್ಲಿಂಗ್ ವಿಳಾಸ ಸುಲಭವಾಗಿ ಸಿಕ್ಕಿ, ಹಣವನ್ನು ಎಗರಿಸುತ್ತಿದ್ದಾರೆ.
ಹೀಗಾದ್ರೆ ವೈರಸ್ ಪತ್ತೆ ಕಷ್ಟ : ಇ ಕಾಮರ್ಸ್ ವೆಬ್ಸೈಟ್ಗಳು ಅಥವಾ ಸಾಫ್ಟ್ವೇರ್ ಸೇವಾ ವ್ಯವಸ್ಥೆ (ಥರ್ಡ್ ಪಾರ್ಟಿ ಸಾಫ್ಟ್ ವೇರ್ ಲೈಬ್ರರಿ) ಮುಖಾಂತರ ಹ್ಯಾಕ್ ಮಾಡಲಾಗುತ್ತದೆ. ಒಂದು ವೇಳೆ ಸಾಫ್ಟ್ವೇರ್ ಸೇವಾ ವ್ಯವಸ್ಥೆ ಹ್ಯಾಕ್ ಮಾಡುವಲ್ಲಿ ಯಶಸ್ವಿಯಾದರೆ ಒಂದೇ ಬಾರಿಗೆ ಹಲವು ವೆಬ್ಸೈಟ್ಗಳಿಗೆ ವೈರಸ್ ಇಂಜೆಕ್ಟ್ ಮಾಡಿ ಹ್ಯಾಕ್ ಮಾಡಬಹುದು. ಆಗ ವೈರಸ್ ಪತ್ತೆಹಚ್ಚಿ ಸರಿಪಡಿಸುವುದು ಅತ್ಯಂತ ಕಷ್ಟವಾಗುತ್ತದೆ ಎಂದು ಸೈಬರ್ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ಕ್ರೆಡಿಟ್ ಕಾರ್ಡ್ ಬಳಕೆ ಸೂಕ್ತ : ಆನ್ಲೈನ್ ಖರೀದಿಗೆ ಡೆಬಿಟ್ ಕಾರ್ಡ್ಗಿಂತ ಕ್ರೆಡಿಟ್ ಕಾರ್ಡ್ ಬಳಕೆಯೇ ಸೂಕ್ತ. ಕ್ರೆಡಿಟ್ ಕಾರ್ಡ್ಗಳ ಹಣಕಾಸಿಗೆ ಇಂತಿಷ್ಟು ಮಿತಿ ಇರುತ್ತದೆ. ಹ್ಯಾಕ್ ಮಾಡಿದರೂ ಕೂಡ ಮಿತಿಗಿಂತ ಹೆಚ್ಚಿನ ಹಣ ಲಪಟಾಯಿಸಲು ಸಾಧ್ಯವಿಲ್ಲ. ಡೆಬಿಟ್ ಕಾರ್ಡ್ ಹ್ಯಾಕ್ ಆದರೆ ಅದರಲ್ಲಿರುವ ಅಷ್ಟೂ ಹಣ ಹ್ಯಾಕರ್ಸ್ ಪಾಲಾಗುತ್ತದೆ.
ಇ ಕಾಮರ್ಸ್ ವೆಬ್ಸೈಟ್ಗಳು ಆಂಟಿ ವೈರಸ್ ಸೇರಿ ಹೈ ಸೆಕ್ಯುರಿಟಿ ವ್ಯವಸ್ಥೆ ಅಳವಡಿಸಿಕೊಳ್ಳಬೇಕು. ಹ್ಯಾಕ್ ಆದರೂ ತ್ವರಿತವಾಗಿ ಸರಿಪಡಿಸಲು ಪರ್ಯಾಯ ಬ್ಯಾಕಪ್ ವ್ಯವಸ್ಥೆ ಇಟ್ಟುಕೊಂಡಿರಬೇಕು. ಹ್ಯಾಕ್ ಆದ ಕೂಡಲೇ ಸರಿಪಡಿಸಿದರೆ ಮತ್ತೆ ಹ್ಯಾಕ್ ಮಾಡುವ ಧೈರ್ಯ ಮಾಡುವುದಿಲ್ಲ.
| ಯಶವಂತ ಕುಮಾರ್, ಸೈಬರ್ ಕ್ರೖೆಂ ಅಧಿಕಾರಿ
ಟಾರ್ಗೆಟ್ ಯಾರು?
ಇ-ಕಾಮರ್ಸ್ ವ್ಯವಹಾರದ ಶೇ.40ಕ್ಕಿಂತ ಹೆಚ್ಚು ವಂಚನೆಗಳು ಸುರಕ್ಷಿತ ಪಾಸ್ವರ್ಡ್ ಹಾಕದಿರುವುದರಿಂದ ನಡೆಯುತ್ತದೆ. ಹೆಸರು, ಜನ್ಮ ದಿನಾಂಕ, ಮೊಬೈಲ್ ನಂಬರ್, ಮದುವೆ ದಿನಾಂಕದಂಥ ಸಂಖ್ಯೆಗಳನ್ನು ಪಾಸ್ವರ್ಡ್ಗಳಾಗಿ ಕೊಟ್ಟರೆ ಸುಲಭವಾಗಿ ಹ್ಯಾಕ್ ಮಾಡಲು ಸಾಧ್ಯ. ಹೀಗಾಗಿ ವಿಶೇಷ ಕ್ಯಾರೆಕ್ಟರ್ಗಳು ಹಾಗೂ ಊಹಿಸಲು ಸಾಧ್ಯವಾಗದ ರೀತಿ ಅಂಕಿಗಳನ್ನು ಕೊಡಬೇಕು.
ಹ್ಯಾಕಿಂಗ್ ತಡೆ ಹೇಗೆ?
* ಅಡ್ರೆಸ್ ಬಾರ್ https:// ರೀತಿಯಲ್ಲಿ ಆರಂಭವಾಗಿರಬೇಕು. http:// ಎಂದಿದ್ದರೆ ಬಳಸಬೇಡಿ.
* ವೆಬ್ಸರ್ವರ್, ಡಾಟಾ ಬೇಸ್ ಸರ್ವರ್ಗಳನ್ನು ಇತ್ತೀಚೆಗಿನ ವರ್ಷನ್ ಸಾಫ್ಟ್ವೇರ್ ಬಳಸಬೇಕು. – ವ್ಯವಹಾರ ಆರಂಭಿಸುವ ಮುನ್ನ ಭದ್ರತಾ ಏಜೆನ್ಸಿ ನೀಡಿರುವಪ್ರಮಾಣ ಪತ್ರವನ್ನು ಗಮನಿಸಬೇಕು. – ಆಂಟಿ ವೈರಸ್ ಹಾಕಿಸಿಕೊಳ್ಳಿ. ಸೈಬರ್ ಕೆಫೆಗಳಲ್ಲಿ ಇ ಕಾಮರ್ಸ್ ವ್ಯವಹಾರ ಮಾಡುವುದು ಬೇಡ. -ಪಿನ್ ನಂಬರ್ ಹಂಚಿಕೊಳ್ಳಬೇಡಿ. ಕಾರ್ಡ್ ಹಿಂದಿರುವ ಸಿವಿವಿ ನಂಬರ್ ಸಹ ಹಂಚಿಕೊಳ್ಳಬೇಡಿ.
* ವೆಬ್ಸೈಟ್ಗಳಲ್ಲಿ ನಿಮ್ಮ ಮಾಹಿತಿ ಸಂಗ್ರಹಿಸಿಡುವ ವ್ಯವಸ್ಥೆಯನ್ನು ಸಾಧ್ಯವಾದಷ್ಟು ತಿರಸ್ಕರಿಸಿ.
ಕೃಪೆ:ವಿಜಯವಾಣಿ
