ಮೈಸೂರು,ಅಕ್ಟೋಬರ್‌,15,2026 (www.justkannada.in): ಕಾಡಾನೆ ದಾಳಿಯಿಂದಾಗಿ ರೈತರೊಬ್ಬರ ಜಮೀನಿನ ಬೋರ್‌ ವೆಲ್‌ ಹಾನಿಯಾಗಿದ್ದು ಸೂಕ್ತ ಪರಿಹಾರಕ್ಕೆ ರೈತ ಮನವಿ ಮಾಡಿದ್ದಾರೆ.
ಗುಜ್ಜೇಗೌಡನಪುರದಲ್ಲಿ ರೈತ ಶಂಭಯ್ಯ ಅವರ ಜಮೀನಿನಲ್ಲಿದ್ದ ಬೋರ್‌ ವೆಲ್‌ ಕಾಡಾನೆ ದಾಳಯಿಂದ ಹಾನಿಗೊಳಗಾಗಿದೆ. ಉಂಟಾಗಿರುವ ಹಾನಿ ಕೇವಲ ಒಬ್ಬ ರೈತನ ಸಮಸ್ಯೆಯಲ್ಲ; ಅರಣ್ಯದಂಚಿನ ಗ್ರಾಮಗಳಲ್ಲಿ ಕೃಷಿ ಮಾಡಿಕೊಂಡು ಬದುಕುತ್ತಿರುವ ರೈತರ ಆತಂಕಕ್ಕೆ ಕನ್ನಡಿ ಹಿಡಿದಿದೆ.
ಅರಣ್ಯದಂಚಿನ ಗ್ರಾಮಗಳಲ್ಲಿ ಕಾಡಾನೆಗಳ ಸಂಚಾರ ಸಹಜವಾದರೂ, ಅವುಗಳಿಂದ ಕೃಷಿ ಚಟುವಟಿಕೆಗಳಿಗೆ ಪದೇಪದೇ ಹಾನಿಯಾಗುವುದನ್ನು ತಡೆಯಲು ಪರಿಣಾಮಕಾರಿ ಕ್ರಮಗಳು ಅಗತ್ಯ. ಕಾಡಾನೆಗಳ ಚಲನವಲನದ ಮೇಲೆ ನಿಗಾ, ರೈತರಿಗೆ ಮುನ್ನೆಚ್ಚರಿಕೆ, ಬೆಳೆ ಮತ್ತು ಕೃಷಿ ಉಪಕರಣಗಳ ರಕ್ಷಣೆ ಹಾಗೂ ಹಾನಿಗೊಳಗಾದವರಿಗೆ ತ್ವರಿತ ಪರಿಹಾರ ಒದಗಿಸುವುದು ಅರಣ್ಯ ಇಲಾಖೆಯ ಆದ್ಯತೆಯಾಗಬೇಕಿದೆ.
ಶಾಸಕ ಜಿ.ಟಿ.ದೇವೇಗೌಡ ಹಾಗೂ ಅರಣ್ಯ ಇಲಾಖೆ ಇನ್ನಾದರೂ ಎಚ್ಚೆತ್ತುಕೊಂಡು ಗುಜ್ಜೇಗೌಡನಪುರದ ಕಾಡಾನೆ ಹಾವಳಿಗೆ ಪರಿಹಾರ ಕಂಡುಕೊಳ್ಳುತ್ತಾರೆಯೇ? ಹಾನಿಗೊಳಗಾದ ರೈತ ಶಂಭಯ್ಯ ಅವರಿಗೆ ನೆರವು ದೊರೆಯುತ್ತದೆಯೇ? ಅಥವಾ ಕಾಡಾನೆಗಳ ದಾಳಿಗೆ ರೈತರು ತಮ್ಮ ಕೃಷಿ ಸಂಪನ್ಮೂಲಗಳನ್ನು ಕಳೆದುಕೊಳ್ಳುತ್ತಲೇ ಇರಬೇಕೇ? ಎಂಬುದನ್ನು ಕಾದು ನೋಡಬೇಕಿದೆ.
