ನವದೆಹಲಿ,ಅಕ್ಟೋಬರ್,10,2026 (www.justkannada.in): ದೇಶಾದ್ಯಂತ ಡಿಜಿಟಲ್ ಪಾವತಿ ವ್ಯವಸ್ಥೆಯಲ್ಲಿ ಮಹತ್ವದ ಪಾತ್ರ ವಹಿಸಿರುವ ಯುಪಿಐ ವಹಿವಾಟುಗಳ ಮೇಲೆ ಮರ್ಚೆಂಟ್ ಡಿಸ್ಕೌಂಟ್ ರೇಟ್ (ಎಂಡಿಆರ್) ಶುಲ್ಕ ವಿಧಿಸುವ ಪ್ರಕ್ರಿಯೆಯನ್ನು ದೀಪಾವಳಿ ಹಬ್ಬದ ಬಳಿಕ ಜಾರಿಗೊಳಿಸಲು ಭಾರತೀಯ ರಾಷ್ಟ್ರೀಯ ಪಾವತಿ ನಿಗಮ ನಿರ್ಧರಿಸಿದೆ ಎಂಬ ಮಾಹಿತಿ ಲಭ್ಯವಾಗಿದೆ.
ನಿಗದಿಯಂತೆ ಇದೇ ಅಕ್ಟೋಬರ್ 15 ರಿಂದ ಯುಪಿಐ ಎಂಡಿಆರ್ ನಿಯಮ ಜಾರಿಗೆ ಬರಬೇಕಿತ್ತು. ಆದರೆ ವ್ಯಾಪಾರಿಗಳು ಮತ್ತು ಪಾವತಿ ಸೇವಾ ಸಂಸ್ಥೆಗಳ ತೀವ್ರ ಮನವಿಗೆ ಸ್ಪಂದಿಸಿರುವ ಎನ್‌ ಪಿಸಿಐ, ಈ ಪ್ರಸ್ತಾವನೆಯನ್ನು ತಡೆಹಿಡಿದಿತ್ತು.
ಇದೀಗ ದೀಪಾವಳಿ ಬಳಿಕ ಯುಪಿಐ ಎಂಡಿಆರ್ ಜಾರಿ ಮಾಡಲು ನಿರ್ಧರಿಸಿದೆ. ವ್ಯಕ್ತಿಯಿಂದ ವ್ಯಕ್ತಿಗೆ ಯುಪಿಐ ಪಾವತಿಗೆ ಯಾವುದೇ ಶುಲ್ಕವಿಲ್ಲ. ವಹಿವಾಟಿನ ಮೊತ್ತ ಎಷ್ಟೇ ಇದ್ದರೂ ಪಿ2ಪಿ ಪಾವತಿ ಸಂಪೂರ್ಣ ಉಚಿತವಾಗಿರಲಿದೆ. ಆದರೆ 2 ಸಾವಿರ ಕ್ಕಿಂತ ಹೆಚ್ಚಿನ ಪಿ2ಎಂ(ವ್ಯಕ್ತಿ ವ್ಯಾಪಾರಿ) ವಹಿವಾಟಿಗೆ ಎಂಡಿಆರ್ ಇರಲಿದೆ ಎಂದು ಎನ್‌ಪಿಸಿಐ ತಿಳಿಸಿದೆ.
