ಮೈಸೂರು, ನ.14, 2026: ಮೈಸೂರು ನಗರ ಪೊಲೀಸ್ ಆಯುಕ್ತರಾಗಿ ಸೇವೆ ಸಲ್ಲಿಸಿದ ಸೀಮಾ ಲಾಟ್ಕರ್ ಅವರು ವರ್ಗಾವಣೆಯ ಬಳಿಕ ಮೈಸೂರಿನ ಜನತೆಗೆ ಭಾವುಕ ಧನ್ಯವಾದ ಅರ್ಪಿಸಿದ್ದಾರೆ.
“ಕೊನೆಗೂ ಬಹುದಿನಗಳಿಂದ ನಿರೀಕ್ಷಿಸುತ್ತಿದ್ದ ವರ್ಗಾವಣೆ ಬಂದಿದೆ. ವರ್ಗಾವಣೆಯ ಕತ್ತಿ ತಲೆಯ ಮೇಲೆ ತೂಗುತ್ತಿದ್ದರೂ, ಕರ್ತವ್ಯ ಹಾಗೂ ಜವಾಬ್ದಾರಿಗಳನ್ನು ನಿರ್ವಹಿಸುವಲ್ಲಿ ಒಂದು ಕ್ಷಣವನ್ನೂ ವ್ಯರ್ಥ ಮಾಡಲಿಲ್ಲ” ಎಂದು ಅವರು ತಮ್ಮ ಸಂದೇಶದಲ್ಲಿ ತಿಳಿಸಿದ್ದಾರೆ.
ಮೈಸೂರಿನಲ್ಲಿ ಸುಮಾರು ನಾಲ್ಕು ವರ್ಷಗಳ ಕಾಲ, ಅದರಲ್ಲಿ ಎರಡು ವರ್ಷಕ್ಕೂ ಹೆಚ್ಚು ಕಾಲ ನಗರ ಪೊಲೀಸ್ ಆಯುಕ್ತರಾಗಿ ಸೇವೆ ಸಲ್ಲಿಸಿರುವುದು ತಮ್ಮ ಪಾಲಿಗೆ ವಿಶೇಷ ಅನುಭವ ಎಂದು ಹೇಳಿದ್ದಾರೆ. “ಇದು ಒಂದು ರೀತಿಯಲ್ಲಿ ಪವಾಡಕ್ಕಿಂತ ಕಡಿಮೆಯಲ್ಲ. ಮೂರು ದಸರಾಗಳನ್ನು ಮೈಸೂರು ನಗರ ಪೊಲೀಸ್ ಆಯುಕ್ತೆಯಾಗಿ ಆಚರಿಸುವ ಅಪರೂಪದ ಅವಕಾಶ ನನಗೆ ದೊರೆಯಿತು” ಎಂದು ಸೀಮಾ ಲಾಟ್ಕರ್ ಸ್ಮರಿಸಿದ್ದಾರೆ.
ತಮ್ಮ ಸೇವಾವಧಿಯ ಯಶಸ್ಸಿಗೆ ಪೊಲೀಸ್ ಇಲಾಖೆಯ ಎಲ್ಲಾ ಹಂತಗಳ ಅಧಿಕಾರಿಗಳು ಹಾಗೂ ಸಿಬ್ಬಂದಿಯ ವೃತ್ತಿಪರ ಸಾಮರ್ಥ್ಯ ಮತ್ತು ತಂಡದ ಸಹಕಾರವೇ ಪ್ರಮುಖ ಕಾರಣ ಎಂದು ಅವರು ತಿಳಿಸಿದ್ದಾರೆ. ನಾಯಕತ್ವದೊಂದಿಗೆ ತಂಡದ ಪ್ರತಿಯೊಬ್ಬರ ಸಹಕಾರವೂ ತಮ್ಮ ಕಾರ್ಯಕ್ಕೆ ಬಲ ನೀಡಿತು ಎಂದಿದ್ದಾರೆ.
ಅದೇ ರೀತಿ ರಾಜಕೀಯ ನಾಯಕತ್ವ, ಜಿಲ್ಲಾಡಳಿತ, ಪತ್ರಿಕಾ ಮತ್ತು ಮಾಧ್ಯಮಗಳು ಹಾಗೂ ಮುಖ್ಯವಾಗಿ ಮೈಸೂರಿನ ಜನತೆ ನೀಡಿದ ಸಹಕಾರದಿಂದ ನಗರವು ಇತ್ತೀಚಿನ ವರ್ಷಗಳಲ್ಲಿ ಅತ್ಯಂತ ಶಾಂತಿಯುತವಾಗಿರಲು ಸಾಧ್ಯವಾಯಿತು ಎಂದು ಅವರು ಕೃತಜ್ಞತೆ ಸಲ್ಲಿಸಿದ್ದಾರೆ.
“ಮೈಸೂರಿನಲ್ಲಿನ ಈ ಸೇವಾವಧಿ ನನ್ನನ್ನು ಮತ್ತಷ್ಟು ದೃಢಗೊಳಿಸಿದೆ ಹಾಗೂ ನನ್ನ ವೃತ್ತಿಜೀವನವನ್ನು ಮತ್ತಷ್ಟು ಉನ್ನತಿಗೇರಿಸಿದೆ. ಮುಂದಿನ ದಿನಗಳಲ್ಲಿ ಇನ್ನಷ್ಟು ಸವಾಲಿನ ಜವಾಬ್ದಾರಿಗಳನ್ನು ಎದುರು ನೋಡುತ್ತಿದ್ದೇನೆ” ಎಂದು ಸೀಮಾ ಲಾಟ್ಕರ್ ಹೇಳಿದ್ದಾರೆ.
“ಎಲ್ಲರಿಗೂ ಹೃತ್ಪೂರ್ವಕ ಧನ್ಯವಾದಗಳು” ಎಂದು ತಮ್ಮ ವಿದಾಯ ಸಂದೇಶವನ್ನು ಮುಕ್ತಾಯಗೊಳಿಸಿದ್ದಾರೆ.
KEY WORDS:
Seema Latkar, Mysuru Police Commissioner, Mysuru Police, Seema Latkar Transfer, Mysuru City Police, Mysuru Dasara 2026, Mysuru Police Commissioner Transfer
