ಮೈಸೂರು, ನವೆಂಬರ್,9,2026 (www.justlannada.in): ಮೈಸೂರಿನ ಓರಿಯೆಂಟಲ್ ರಿಸರ್ಚ್ ಇನ್‌ಸ್ಟಿಟ್ಯೂಟ್‌ನಲ್ಲಿರುವ ಕೌಟಿಲ್ಯನ ‘ಅರ್ಥಶಾಸ್ತ್ರ’ದ ಪ್ರಾಚೀನ ತಾಳೆಗರಿ ಹಸ್ತಪ್ರತಿಗೆ ಜಾಗತಿಕ ಮಟ್ಟದ ಮಹತ್ವದ ಮಾನ್ಯತೆ ದೊರೆತಿದೆ. UNESCO Memory of the World – Asia and the Pacific Regional Registerಗೆ ಈ ಅಮೂಲ್ಯ ಹಸ್ತಪ್ರತಿಯನ್ನು ಸೇರ್ಪಡೆಗೊಳಿಸಲಾಗಿದೆ.
2026ರ ನವೆಂಬರ್ 5ರಂದು UNESCO ಪ್ರಮಾಣಪತ್ರದ ಮೂಲಕ ಈ ಸೇರ್ಪಡೆಯನ್ನು ಅಧಿಕೃತವಾಗಿ ದೃಢಪಡಿಸಲಾಗಿದೆ. ಜಕಾರ್ತಾದಲ್ಲಿ ನಡೆದ *Memory of the World Committee for Asia and the Pacific (MOWCAP)*ನ 11ನೇ ಅಧಿವೇಶನದಲ್ಲಿ ಈ ನಿರ್ಧಾರ ಕೈಗೊಳ್ಳಲಾಗಿದೆ.
ಮೈಸೂರಿನ *Oriental Research Institute (ORI)*ಯಲ್ಲಿ ಸಂರಕ್ಷಿಸಲ್ಪಟ್ಟಿರುವ ಈ ಹಸ್ತಪ್ರತಿ ಕೌಟಿಲ್ಯನ ಅರ್ಥಶಾಸ್ತ್ರದ ಸಂಪೂರ್ಣ 16ನೇ ಶತಮಾನದ ತಾಳೆಗರಿ ಪ್ರತಿಯಾಗಿದ್ದು, ಆಡಳಿತ, ಆರ್ಥಿಕ ನೀತಿ, ರಾಜ್ಯನೀತಿ ಹಾಗೂ ರಾಜತಾಂತ್ರಿಕ ಮತ್ತು ಸೈನಿಕ ತಂತ್ರಗಳ ಕುರಿತು ಪ್ರಾಚೀನ ಭಾರತದ ಜ್ಞಾನವನ್ನು ಪ್ರತಿಬಿಂಬಿಸುತ್ತದೆ.
ವಿಶೇಷವೆಂದರೆ, ಕೌಟಿಲ್ಯನ ಅರ್ಥಶಾಸ್ತ್ರದ ಅತ್ಯಂತ ಮಹತ್ವದ ಹಸ್ತಪ್ರತಿ ಮೈಸೂರಿನಲ್ಲೇ ಸಂರಕ್ಷಿಸಲ್ಪಟ್ಟಿರುವುದು ಕರ್ನಾಟಕದ ಪಾಲಿಗೂ ಹೆಮ್ಮೆಯ ಸಂಗತಿಯಾಗಿದೆ. ಓರಿಯೆಂಟಲ್ ರಿಸರ್ಚ್ ಇನ್‌ಸ್ಟಿಟ್ಯೂಟ್‌ ನಲ್ಲಿ ಸಾವಿರಾರು ಅಪರೂಪದ ತಾಳೆಗರಿ ಮತ್ತು ಕಾಗದದ ಹಸ್ತಪ್ರತಿಗಳನ್ನು ಸಂರಕ್ಷಿಸಲಾಗಿದ್ದು, ಅವುಗಳ ಡಿಜಿಟಲೀಕರಣ ಕಾರ್ಯವೂ ನಡೆಯುತ್ತಿದೆ.
ಒಂದೇ ಬಾರಿ ಮೂರು ಭಾರತೀಯ ಕೃತಿಗಳಿಗೆ ಮಾನ್ಯತೆ
ಕೌಟಿಲ್ಯನ ಅರ್ಥಶಾಸ್ತ್ರದ ಜೊತೆಗೆ ಮಹಾಭಾರತ ಮತ್ತು ಕಲ್ಹಣನ ರಾಜತರಂಗಿಣಿಯ ಹಸ್ತಪ್ರತಿಗಳೂ UNESCOದ ಏಷ್ಯಾ-ಪೆಸಿಫಿಕ್ ಪ್ರಾದೇಶಿಕ ನೋಂದಣಿಗೆ ಸೇರ್ಪಡೆಯಾಗಿವೆ. ಇದರೊಂದಿಗೆ ಈ ಪ್ರಾದೇಶಿಕ ರಿಜಿಸ್ಟರ್‌ನಲ್ಲಿ ಭಾರತದ ಒಟ್ಟು ಸೇರ್ಪಡೆಗಳ ಸಂಖ್ಯೆ ಆರುಕ್ಕೆ ಏರಿದೆ.
ಮೈಸೂರಿನ ಅರ್ಥಶಾಸ್ತ್ರದ ಹಸ್ತಪ್ರತಿಗೆ ದೊರೆತಿರುವ ಈ ಮಾನ್ಯತೆ ಕೇವಲ ಒಂದು ಪ್ರಾಚೀನ ಗ್ರಂಥಕ್ಕೆ ಸಿಕ್ಕ ಗೌರವವಲ್ಲ; ಭಾರತದ ಆಡಳಿತ ಪರಂಪರೆ, ಜ್ಞಾನ ಪರಂಪರೆ ಹಾಗೂ ಕರ್ನಾಟಕದ ಮೈಸೂರಿನಲ್ಲಿ ಸಂರಕ್ಷಿಸಲ್ಪಟ್ಟಿರುವ ಅಪೂರ್ವ ದಾಖಲೆಗಳಿಗೆ ದೊರೆತಿರುವ ಜಾಗತಿಕ ಮಾನ್ಯತೆಯಾಗಿದೆ.
Kautilya’s ‘Arthashastra, included, UNESCO, Memory of the World Asia-Pacific, Register
