ಶಿವಮೊಗ್ಗ,ಅಕ್ಟೋಬರ್,22,2026(www.justkannada.in): ದಸರಾ ಮೆರವಣಿಗೆಯಲ್ಲಿ ಆನೆಯೊಂದು ಬೆದರಿ ಪುಂಡಾಟ ನಡೆಸಿ, ಮಾವುತನಿಗೆ ಗಾಯವಾಗಿರುವ ಹಾಗೂ ವಾಹನಗಳಿಗೆ ಹಾನಿಯಾಗಿರುವ ಘಟನೆ ಬೆನ್ನಲ್ಲೇ, ರಾಜ್ಯದ ದಸರಾ ಉತ್ಸವಗಳಲ್ಲಿ ಜೀವಂತ ಆನೆಗಳ ಬಳಕೆಯನ್ನು ನಿಲ್ಲಿಸಿ ಯಾಂತ್ರಿಕ ಆನೆಗಳನ್ನು ಬಳಸುವಂತೆ ಪೇಟಾ ಇಂಡಿಯಾ ಸರ್ಕಾರವನ್ನು ಒತ್ತಾಯಿಸಿದೆ.
ಈ ಸಂಬಂಧ ಅರಣ್ಯ ಸಚಿವ ರಾಮಲಿಂಗಾರೆಡ್ಡಿ ಅವರಿಗೆ ಪತ್ರ ಬರೆದಿರುವ ಸಂಸ್ಥೆ, ಮುಂದಿನ ದಸರಾ ಉತ್ಸವಗಳಿಗೆ ಯಾಂತ್ರಿಕ ಆನೆಗಳನ್ನು ಒದಗಿಸಲು ಸಹಕರಿಸುವುದಾಗಿ ತಿಳಿಸಿದೆ. ಅಕ್ಟೋಬರ್ 21ರಂದು ಶಿವಮೊಗ್ಗ ದಸರಾ ಮೆರವಣಿಗೆಯಲ್ಲಿ ಸುಮಾರು 650 ಕೆ.ಜಿ. ತೂಕದ ಅಂಬಾರಿ ಹೊತ್ತಿದ್ದ ಸೋಮಣ್ಣ ಆನೆ ಬೆದರಿ ಓಡಾಟ ನಡೆಸಿದ ಪರಿಣಾಮ ಅಂಬಾರಿ ಕೆಳಗೆ ಬಿದ್ದಿದ್ದು, ವಾಹನಗಳಿಗೆ ಹಾನಿಯಾಗಿದೆ ಎಂದು ವರದಿಯಾಗಿದೆ.
ಮಂಡ್ಯದ ಡಿಎಂಎಸ್ ಚಂದ್ರವನ ಆಶ್ರಮಕ್ಕೆ ಪೇಟಾ ಇಂಡಿಯಾ ಮತ್ತು CUPA ಸಂಸ್ಥೆಗಳು ಇತ್ತೀಚೆಗೆ ‘ಶಿವಯೋಗೀಶ್ವರ’ ಎಂಬ ಯಾಂತ್ರಿಕ ಆನೆಯನ್ನು ಕೊಡುಗೆಯಾಗಿ ನೀಡಿವೆ. ಇದು ಕರ್ನಾಟಕದಲ್ಲಿ ಈ ಸಂಸ್ಥೆಗಳ ಸಹಯೋಗದಲ್ಲಿ ನೀಡಲಾದ 11ನೇ ಯಾಂತ್ರಿಕ ಆನೆಯಾಗಿದೆ.
ಆನೆಗಳ ಸುರಕ್ಷತೆ ಮತ್ತು ಸಾರ್ವಜನಿಕರ ಹಿತದೃಷ್ಟಿಯಿಂದ ಜೀವಂತ ಆನೆಗಳ ಬದಲಿಗೆ ಯಾಂತ್ರಿಕ ಆನೆಗಳನ್ನು ಬಳಸಬೇಕು. ಬಂಧನದಲ್ಲಿರುವ ಆನೆಗಳನ್ನು ಅಭಯಾರಣ್ಯಗಳಿಗೆ ಸ್ಥಳಾಂತರಿಸಿ, ಸ್ವತಂತ್ರವಾಗಿ ಬದುಕಲು ಅವಕಾಶ ಕಲ್ಪಿಸಬೇಕು ಎಂದು ಪೇಟಾ ಇಂಡಿಯಾ ಆಗ್ರಹಿಸಿದೆ.
