ಬೆಂಗಳೂರು ಸೆ.೨೬,೨೦೨೬: ಪ್ರಸ್ತುತ ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರದ (BDA) ಆಯುಕ್ತರಾಗಿ ಕಾರ್ಯನಿರ್ವಹಿಸುತ್ತಿರುವ ಮೇಜರ್ ಮಣಿವಣ್ಣನ್, ಐಎಎಸ್ ಅವರಿಗೆ ಪ್ರಾದೇಶಿಕ ಸೇನೆ (Territorial Army)ಯಲ್ಲಿ ಸಲ್ಲಿಸಿದ ನಿರಂತರ ಸೇವೆ, ಕಠಿಣ ಪರಿಶ್ರಮ, ಸಮರ್ಪಣಾ ಭಾವ ಹಾಗೂ ಅತ್ಯುತ್ತಮ ಕಾರ್ಯನಿರ್ವಹಣೆಯನ್ನು ಗುರುತಿಸಿ ಗೌರವ ಸಲ್ಲಿಸಲಾಗಿದೆ.
ಮೇಜರ್ ಮಣಿವಣ್ಣನ್ ಅವರು 2014ರ ಫೆಬ್ರವರಿ 8ರಂದು 106 ಇನ್ಫೆಂಟ್ರಿ ಬೆಟಾಲಿಯನ್ (ಟಿಎ) ಪ್ಯಾರಾ ಘಟಕಕ್ಕೆ ನಿಯೋಜನೆಗೊಂಡಿದ್ದರು. ಅಂದಿನಿಂದ ಪ್ರಾದೇಶಿಕ ಸೇನೆಯಲ್ಲಿ ತಮ್ಮ ಜವಾಬ್ದಾರಿಗಳನ್ನು ಅತ್ಯಂತ ನಿಷ್ಠೆ ಹಾಗೂ ಸಮರ್ಪಣೆಯಿಂದ ನಿರ್ವಹಿಸುತ್ತಾ ಬಂದಿದ್ದಾರೆ.
ಅವರ ನಿರಂತರ ಕಠಿಣ ಪರಿಶ್ರಮ, ಸಮರ್ಪಣೆ ಮತ್ತು ಸೇನೆಯೊಂದಿಗೆ ಉತ್ತಮ ಸಹಯೋಗವನ್ನು ಪರಿಗಣಿಸಿ, ಚೀಫ್ ಆಫ್ ಡಿಫೆನ್ಸ್ ಸ್ಟಾಫ್ ಜನರಲ್ ಎನ್. ಎಸ್. ರಾಜಾ ಸುಬ್ರಮಣಿ ಅವರಿಂದ ಪ್ರಶಂಸಾ ಪತ್ರ ನೀಡಿ ಗೌರವಿಸಲಾಗಿದೆ. ಜನರಲ್ ಎನ್. ಎಸ್. ರಾಜಾ ಸುಬ್ರಮಣಿ ಅವರು ಪರಮ ವಿಶಿಷ್ಟ ಸೇವಾ ಮೆಡಲ್ (PVSM), ಅತಿ ವಿಶಿಷ್ಟ ಸೇವಾ ಮೆಡಲ್ (AVSM), ಸೇನಾ ಮೆಡಲ್ (SM) ಹಾಗೂ ವಿಶಿಷ್ಟ ಸೇವಾ ಮೆಡಲ್ (VSM) ಪುರಸ್ಕೃತರಾಗಿದ್ದಾರೆ.
ಇದೇ ವೇಳೆ, ಪ್ರಾದೇಶಿಕ ಸೇನೆಯಲ್ಲಿ ಮೇಜರ್ ಮಣಿವಣ್ಣನ್ ಅವರ ಕಠಿಣ ಪರಿಶ್ರಮ, ನಿರಂತರ ಸಹಯೋಗ, ಸಮರ್ಪಣಾ ಮನೋಭಾವ ಮತ್ತು ಶ್ರೇಷ್ಠ ಕಾರ್ಯನಿರ್ವಹಣೆಯನ್ನು ಗುರುತಿಸಿ, 2026ರ ಏಪ್ರಿಲ್ನಲ್ಲಿ ಗೌರವಾನ್ವಿತ GOC-in-C, ಸದರ್ನ್ ಕಮಾಂಡ್ ಅವರಿಂದಲೂ ಪ್ರಶಂಸಾ ಪತ್ರ ನೀಡಿ ಗೌರವಿಸಲಾಗಿತ್ತು.
ಆಡಳಿತಾತ್ಮಕ ಜವಾಬ್ದಾರಿಗಳೊಂದಿಗೆ ಪ್ರಾದೇಶಿಕ ಸೇನೆಯಲ್ಲಿ ಸೇವೆ ಸಲ್ಲಿಸುತ್ತಿರುವ ಮೇಜರ್ ಮಣಿವಣ್ಣನ್ ಅವರಿಗೆ ದೊರೆತಿರುವ ಈ ಎರಡು ಗೌರವಗಳು, ನಾಗರಿಕ ಆಡಳಿತ ಮತ್ತು ಸೇನಾ ಸೇವೆ ಎರಡರಲ್ಲೂ ಅವರು ತೋರಿಸಿರುವ ಬದ್ಧತೆ ಹಾಗೂ ಸೇವಾ ಮನೋಭಾವಕ್ಕೆ ದೊರೆತ ಮಾನ್ಯತೆಯಾಗಿದೆ.
KEY WORDS: Major Manivannan IAS, BDA Commissioner, Bengaluru Development Authority, Territorial Army, 106 Infantry Battalion, TA Para, Major Manivannan, Territorial Army, Karnataka IAS Officer, Territorial Army Service
