ಧರ್ಮ ಮತ್ತು ಜಾತಿ ಈ ದೇಶದ ದುರಂತ: ಕಫೀಲ್ ಖಾನ್

Bangalore, oct.05,2026: ಧರ್ಮ ಮತ್ತು ಜಾತಿ ಈ ದೇಶವನ್ನು ನುಂಗಿಹಾಕುತ್ತಿದೆ ಎಂದು ಡಾ. ಕಫೀಲ್ ಖಾನ್ ವಿಷಾದಿಸಿದರು.

ಬಹುರೂಪಿ ಪ್ರಕಾಶನ ಹಮ್ಮಿಕೊಂಡಿದ್ದ ಡಾ. ಕಫೀಲ್ ಖಾನ್ ಅವರ ‘ಗೋರಖಪುರ ಆಸ್ಪತ್ರೆ ದುರಂತ ‘ ಪುಸ್ತಕ ಬಿಡುಗಡೆ ಸಮಾರಂಭದಲ್ಲಿ ಅವರು ಮಾತನಾಡುತ್ತಿದ್ದರು.

ಈ ದೇಶದಲ್ಲಿ ಕಾಪಾಡುವ ಕೈಗಳು ಶಿಕ್ಷೆಗೆ ಒಳಗಾಗಬೇಕಾದ, ಇನ್ನಿಲ್ಲದ ಭಯಾನಕ ಪರಿಸ್ಥಿತಿಯನ್ನು ಎದುರಿಸಬೇಕಾದ ಕರಾಳ ವಾತಾವರಣವಿದೆ. ಇವತ್ತಿನ ವ್ಯವಸ್ಥೆಗೆ ಮಾಧ್ಯಮಗಳೂ ಸಹಾ ಕೈಜೋಡಿಸಿರುವುದು ಪರಿಸ್ಥಿತಿಯನ್ನು ಇನ್ನಷ್ಟು ಗಂಭೀರವಾಗಿಸಿದೆ. ಮಕ್ಕಳನ್ನು ಬದುಕಿಸಿದ ಧೀರ ಎನ್ನುವ ಪ್ರಶಂಸೆ ಮಾಡಿದ ಮಾಧ್ಯಮಗಳೇ ಮಕ್ಕಳನ್ನು ಕೊಂದ ಖಳನಾಯಕ ಎನ್ನುವ ಹಣೆಪಟ್ಟಿ ಅಂಟಿಸಿದವು. ನನ್ನ ಮುಂದೆ ಇದ್ದದ್ದು ಮಕ್ಕಳನ್ನು ಉಳಿಸುವ ಗುರಿಯಷ್ಟೇ. ಆದರೆ ನಾನು 308 ಮಕ್ಕಳನ್ನು ಕೊಂದೆ ಎನ್ನುವ ಆರೋಪ ಹೊರಿಸಿ 9 ತಿಂಗಳುಗಳ ಕಾಲ ಜೈಲಿಗೆ ತಳ್ಳಿದವು ಎಂದು ನೊಂದು ನುಡಿದರು.

ಕೃತಿಯನ್ನು ಅನುವಾದಿಸಿದ ಹಿರಿಯ ಪತ್ರಕರ್ತ ಬಿ. ಎಂ. ಹನೀಫ್ ಅವರು ಮಾತನಾಡಿ ಈ ಕೃತಿ ಮನಸ್ಸನ್ನು ಕಲಕುತ್ತದೆ. ಈ ಕೃತಿಯನ್ನು ಅನುವಾದಿಸುತ್ತಾ ನಾನು ಅತ್ತಿದ್ದೇನೆ ಎಂದು ವಿವರಿಸಿದರು. ಕಫೀಲ್ ಖಾನ್ ಅವರು ವ್ಯವಸ್ಥೆಯ ಕರಾಳತೆಯ ವಿರುದ್ಧ ನಡೆಸಿದ ಹೋರಾಟ ಎಲ್ಲರಿಗೂ ಸ್ಫೂರ್ತಿದಾಯಕ ಎಂದರು.

ಪ್ರಾಸ್ತಾವಿಕವಾಗಿ ಮಾತನಾಡಿದ ಬಹುರೂಪಿಯ ಜಿ ಎನ್ ಮೋಹನ್ ಅವರು ಕಫೀಲ್ ಖಾನ್ ಪ್ರಕರಣ ಇಡೀ ವ್ಯವಸ್ಥೆಗೆ ಕನ್ನಡಿ ಹಿಡಿದಿದೆ. ಇವತ್ತಿನ ಜೆನ್ ಜೀ ಹೋರಾಟಕ್ಕೆ ಕಫೀಲ್ ಖಾನ್ ಅವರು ನಡೆಸಿದ ದೃಢ ಹೋರಾಟವೂ ಸಾಕಷ್ಟು ಶಕ್ತಿ ನೀಡಿದೆ ಎಂದರು.

ಹಿರಿಯ ಲೇಖಕಿ, ಸಾಮಾಜಿಕ ಚಿಂತಕಿ ಡಾ. ವಿಜಯಾ ಹಾಗೂ ಬಹುರೂಪಿ ಸಂಸ್ಥಾಪಕಿ ಶ್ರೀಜಾ ವಿ. ಎನ್ ಅವರು ಉಪಸ್ಥಿತರಿದ್ದರು.

KEY WORDS:

Dr Kafeel Khan, Gorakhpur Hospital Tragedy, Gorakhpur hospital incident, Kafeel Khan book launch, Bahuroopi Prakashana, Religion and caste in India, Bengaluru news, Kafeel Khan speech