ಪ್ರಶ್ನೆ ಕೇಳಿದರೆ ಎಂತಹ ಗದ್ದುಗೆಯಾದರೂ ಅಲುಗಾಡುತ್ತದೆ: ಹಿರಿಯ ಪತ್ರಕರ್ತ ಜಿ.ಎನ್.ಮೋಹನ್
ಪ್ರಭುತ್ವಕ್ಕೆ ಪ್ರಶ್ನೆಗಳ ಭಯ; ಗಾಂಧೀಜಿಯನ್ನು ಇತಿಹಾಸದಿಂದಲೇ ಅಳಿಸುವ ಪ್ರಯತ್ನ ನಡೆಯುತ್ತಿದೆ ಎಂಬ ಆತಂಕ | ‘ಪ್ರಿಯ ಗಾಂಧಿ’ ಕೃತಿ ಕುರಿತು ಸಂವಾದ
ಮೈಸೂರು, ಅ.4: ಪ್ರಶ್ನೆ ಕೇಳಿದರೆ ಎಂತಹ ಗದ್ದುಗೆಯಾದರೂ ತಾನಾಗಿಯೇ ಅಲುಗಾಡುತ್ತದೆ. ಇಂದು ಪ್ರಭುತ್ವಕ್ಕೆ ಪ್ರಶ್ನೆಗಳ ಭಯ ಕಾಡುತ್ತಿರುವುದರಿಂದಲೇ ಜಂತರ್ ಮಂತರ್, ಸ್ವಾತಂತ್ರ್ಯ ಹೋರಾಟಗಾರರ ಉದ್ಯಾನವನ ಹಾಗೂ ಟೌನ್‌ಹಾಲ್‌ಗಳಂತಹ ಸಾರ್ವಜನಿಕ ಸ್ಥಳಗಳಲ್ಲಿ ಜನರು ಸೇರದಂತೆ ನೋಡಿಕೊಳ್ಳಲಾಗುತ್ತಿದೆ ಎಂದು ಹಿರಿಯ ಪತ್ರಕರ್ತ ಜಿ.ಎನ್.ಮೋಹನ್ ಅಭಿಪ್ರಾಯಪಟ್ಟರು.
ನಗರದ ಹಾರ್ಡ್ವಿಕ್ ಶಾಲೆಯ ರಂಗಮಂದಿರದಲ್ಲಿ ಭಾರತೀಯ ರಂಗಭೂಮಿ ಶಿಕ್ಷಣ ಸಂಸ್ಥೆ ಮತ್ತು ರಂಗವಲ್ಲಿ ವತಿಯಿಂದ ಗಾಂಧಿ ಸ್ಮರಣೆಯ ಅಂಗವಾಗಿ ಆಯೋಜಿಸಿದ್ದ ‘ಪ್ರಿಯ ಗಾಂಧಿ’ ಕೃತಿ ಕುರಿತ ಸಂವಾದ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಅವರು ಮಾತನಾಡಿದರು.
ಇಂದು ಪ್ರಶ್ನೆ ಕೇಳುವುದನ್ನೇ ನಿಲ್ಲಿಸುವಂತಹ ವಾತಾವರಣ ನಿರ್ಮಿಸಲಾಗುತ್ತಿದೆ. ಪ್ರಭುತ್ವಕ್ಕೆ ಪ್ರಶ್ನೆಗಳ ಭಯ ಕಾಡುತ್ತಿದ್ದು, ಗಾಂಧೀಜಿಯವರನ್ನು ಇತಿಹಾಸದಿಂದಲೇ ತೆಗೆದುಹಾಕುವ ಪ್ರಯತ್ನಗಳು ನಡೆಯುತ್ತಿವೆ ಎಂಬ ಆತಂಕವನ್ನೂ ಅವರು ವ್ಯಕ್ತಪಡಿಸಿದರು.
ಜನರನ್ನು ಎಚ್ಚರಿಸುವುದೇ ಬರವಣಿಗೆಯ ಉದ್ದೇಶ
ಗೋಪಾಲಕೃಷ್ಣ ಗೋಖಲೆ ಮತ್ತು ಮಹಾತ್ಮ ಗಾಂಧೀಜಿಯವರ ನಡುವಿನ ಪ್ರಸಂಗವನ್ನು ಉಲ್ಲೇಖಿಸಿದ ಜಿ.ಎನ್.ಮೋಹನ್, ಗೋಖಲೆ ಅವರು ಬ್ರಿಟಿಷ್ ವೈಸರಾಯ್‌ಗೆ ಮರಾಠಿಯಲ್ಲಿ ಪತ್ರ ಬರೆಯುತ್ತಿದ್ದುದನ್ನು ಕಂಡ ಗಾಂಧೀಜಿ, ವೈಸರಾಯ್‌ಗೆ ಮರಾಠಿ ಹೇಗೆ ಅರ್ಥವಾಗುತ್ತದೆ ಎಂದು ವ್ಯಂಗ್ಯವಾಗಿ ಪ್ರಶ್ನಿಸಿದ ಘಟನೆಯನ್ನು ವಿವರಿಸಿದರು.
ಅದಕ್ಕೆ ಗೋಖಲೆ ಅವರು, ತಾವು ವೈಸರಾಯ್‌ಗಾಗಿ ಮಾತ್ರವಲ್ಲ, ತಮ್ಮ ಜನರಿಗಾಗಿ ಪತ್ರ ಬರೆಯುತ್ತಿರುವುದಾಗಿ ತಿಳಿಸಿದ್ದರು. ನೋವಿನಲ್ಲಿಯೇ ಬದುಕುವುದನ್ನು ಸಹಜವೆಂದು ಒಪ್ಪಿಕೊಂಡಿರುವ ಜನರನ್ನು ಎಚ್ಚರಿಸುವುದು ತಮ್ಮ ಉದ್ದೇಶ ಎಂಬ ಸಂದೇಶವನ್ನು ಈ ಪ್ರಸಂಗ ಸಾರುತ್ತದೆ ಎಂದು ಅವರು ವಿವರಿಸಿದರು.
ಬರವಣಿಗೆ ಎನ್ನುವುದು ಕೇವಲ ಮಾಹಿತಿ ನೀಡುವ ಸಾಧನವಲ್ಲ; ಜನರಲ್ಲಿ ಜಾಗೃತಿ ಮೂಡಿಸುವ ಮತ್ತು ಸಮಾಜವನ್ನು ಚಿಂತನೆಗೆ ಹಚ್ಚುವ ಪ್ರಬಲ ಮಾಧ್ಯಮವೂ ಹೌದು ಎಂಬುದನ್ನು ಈ ಘಟನೆ ಪ್ರತಿಬಿಂಬಿಸುತ್ತದೆ ಎಂದು ಹೇಳಿದರು.
ಜಾಗತಿಕ ಮಟ್ಟದಲ್ಲಿ ಗಾಂಧೀಜಿ ಪ್ರಭಾವ:
ಮಹಾತ್ಮ ಗಾಂಧೀಜಿಯವರ ಪ್ರಭಾವ ಭಾರತದ ಗಡಿಗಳನ್ನು ಮೀರಿ ವಿಶ್ವದ ಹಲವು ದೇಶಗಳಲ್ಲಿ ವ್ಯಾಪಿಸಿದೆ ಎಂದು ಜಿ.ಎನ್.ಮೋಹನ್ ಹೇಳಿದರು.
ಅಮೆರಿಕಾದ ಸಿ ಎನ್ ಎನ್ ಚಾನಲ್ ನ ಮುಖ್ಯಸ್ಥ ಟೆಡ್ ಟರ್ನರ್ ಭೇಟಿಯಾದಾಗ, ಅವರಿಗೆ ಪ್ರೇರಣೆ ನೀಡಿದ ವ್ಯಕ್ತಿ ಯಾರು ಎಂದು ತಾವು ಪ್ರಶ್ನಿಸಿದ್ದಾಗಿ ತಿಳಿಸಿದರು. ಅದಕ್ಕೆ ಉತ್ತರವಾಗಿ ಅವರು ತಮ್ಮ ಕೊಠಡಿಯಿಂದ ಗಾಂಧೀಜಿಯವರ ಪ್ರತಿಮೆಯನ್ನು ತಂದು ತೋರಿಸಿದ್ದು ತಮಗೆ ಆಶ್ಚರ್ಯ ಮೂಡಿಸಿತ್ತು ಎಂದು ನೆನಪಿಸಿಕೊಂಡರು.
ಅದೇ ರೀತಿ, ಅಟ್ಲಾಂಟಾದ ಮಾರ್ಟಿನ್ ಲೂಥರ್ ಕಿಂಗ್ ಮ್ಯೂಸಿಯಂನಲ್ಲಿ ಗಾಂಧೀಜಿಯವರ ಆಳೆತ್ತರದ ಪ್ರತಿಮೆ ಕಾಣಸಿಗುತ್ತದೆ. ಅಮೆರಿಕದ ಅಧ್ಯಕ್ಷರಾಗಿದ್ದ ಬರಾಕ್ ಒಬಾಮಾ ಅವರಿಗೆ, ಔತಣಕೂಟ ಆಯೋಜಿಸಿದರೆ ಮೊದಲು ಯಾರನ್ನು ಆಹ್ವಾನಿಸುತ್ತೀರಿ ಎಂದು ವಿದ್ಯಾರ್ಥಿಗಳು ಪ್ರಶ್ನಿಸಿದಾಗ, ಮಹಾತ್ಮ ಗಾಂಧೀಜಿಯವರ ಹೆಸರನ್ನು ಉಲ್ಲೇಖಿಸಿದ್ದರು ಎಂಬುದನ್ನೂ ಅವರು ಪ್ರಸ್ತಾಪಿಸಿದರು.
ಈ ಎಲ್ಲ ಉದಾಹರಣೆಗಳು ಗಾಂಧೀಜಿಯವರ ಚಿಂತನೆಗಳು ಮತ್ತು ತತ್ವಗಳು ಜಾಗತಿಕ ಮಟ್ಟದಲ್ಲಿ ಬೀರಿರುವ ಪ್ರಭಾವವನ್ನು ತೋರಿಸುತ್ತವೆ ಎಂದು ಅಭಿಪ್ರಾಯಪಟ್ಟರು.
‘ಪ್ರಿಯ ಗಾಂಧಿ’ ಕೃತಿಯ ಭಾಷೆ, ನಿರೂಪಣೆಗೆ ಮೆಚ್ಚುಗೆ:
ಕಾರ್ಯಕ್ರಮದಲ್ಲಿ ಮಾತನಾಡಿದ ಡಾ. ರಂಗನಾಥಯ್ಯ ಅವರು, ತಾವು ಸುಬ್ಬಣ್ಣನವರ ವಿದ್ಯಾರ್ಥಿನಿಲಯದಲ್ಲಿ ಓದಿದವರಾಗಿದ್ದು, ಸುಬ್ಬಣ್ಣನವರು ಹೇಳಿಕೊಟ್ಟ ಮೌಲ್ಯಗಳನ್ನು ಇಂದಿಗೂ ಅನುಸರಿಸುತ್ತಿರುವುದಾಗಿ ತಿಳಿಸಿದರು.
‘ಪ್ರಿಯ ಗಾಂಧಿ’ ಕೃತಿ ವಿಭಿನ್ನ ಸ್ವರೂಪ ಹೊಂದಿದೆ. ಅದರ ಭಾಷೆ, ಪದಗಳ ಜೋಡಣೆ ಮತ್ತು ನಿರೂಪಣಾ ಶೈಲಿ ಗಾಂಧೀಜಿಯವರ ತತ್ವಗಳಿಗೆ ಹತ್ತಿರವಾಗಿವೆ. ಲೇಖಕರು ತಮ್ಮ ವಿಚಾರಗಳನ್ನು ಓದುಗರಿಗೆ ಮನದಟ್ಟಾಗುವಂತೆ ನಿರೂಪಿಸಿದ್ದು, ಸಂವಹನ ಕೌಶಲವೂ ಉತ್ತಮವಾಗಿದೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.
ಬರವಣಿಗೆಗೆ ನೈತಿಕ ಧೈರ್ಯ ಅಗತ್ಯ: ಉಷಾರಾಣಿ
ನಿವೃತ್ತ ಪ್ರಾಧ್ಯಾಪಕಿ ಉಷಾರಾಣಿ ಮಾತನಾಡಿ, ಲೇಖಕ ಚೀ.ಜ.ರಾಜೀವ್ ಅವರು ತಮ್ಮ ಅಂಕಣ ಬರಹದ ರೂಪವನ್ನು ಬುದ್ಧಿವಂತಿಕೆಯಿಂದ ಆಯ್ಕೆ ಮಾಡಿಕೊಂಡಿದ್ದಾರೆ ಎಂದು ಹೇಳಿದರು.
ಇಂತಹ ಅಂಕಣಗಳು ಸಾರ್ವಜನಿಕ ವಲಯದಲ್ಲಿ ವಿಮರ್ಶೆಗೆ ಒಳಗಾಗುತ್ತವೆ. ಆದ್ದರಿಂದ ಇಂತಹ ಬರಹಗಳನ್ನು ಬರೆಯಲು ನೈತಿಕ ಧೈರ್ಯ ಅಗತ್ಯ. ಪತ್ರಕರ್ತರು ಸತ್ಯಾನ್ವೇಷಣೆಯಲ್ಲಿ ತೊಡಗಿಸಿಕೊಳ್ಳಬೇಕು. ಗಾಂಧೀವಾದದ ಕುರಿತು ಹೆಚ್ಚು ವಿಶ್ಲೇಷಣೆ ಮತ್ತು ಚರ್ಚೆಗಳು ನಡೆದಷ್ಟೂ ಗಾಂಧೀವಾದ ಶ್ರೀಮಂತವಾಗುತ್ತದೆ. ಇಂತಹ ಚರ್ಚೆಗಳು ನಮ್ಮ ಭಾಷೆಯನ್ನೂ ಶುದ್ಧಗೊಳಿಸುತ್ತವೆ ಎಂದು ಅಭಿಪ್ರಾಯಪಟ್ಟರು.
ಉಪಸ್ಥಿತಿ:
ಕಾರ್ಯಕ್ರಮದಲ್ಲಿ ಅಂಕಣಕಾರ ಎನ್. ರವಿಶಂಕರ್ ಸಂವಾದವನ್ನು ನಡೆಸಿಕೊಟ್ಟರು. ಲೇಖಕ ಚೀ.ಜ.ರಾಜೀವ್, ಚಿಂತಕ ವಾದಿರಾಜ್, ಮೈಸೂರು ವಿಶ್ವವಿದ್ಯಾಲಯದ ಸಿಂಡಿಕೇಟ್‌ನ ಮಾಜಿ ಸದಸ್ಯ ಡಾ. ಈ.ಸಿ. ನಿಂಗರಾಜೇಗೌಡ, ಪತ್ರಕರ್ತ ಕೊಳ್ಳೇಗಾಲ ಮಹೇಶ್ ಹಾಗೂ ಪ್ರಕಾಶಕ ನಿಂಗರಾಜ್ ಚಿತ್ತಣ್ಣನವರ್ ಸೇರಿದಂತೆ ಹಲವರು ಉಪಸ್ಥಿತರಿದ್ದರು. ಲೇಖಕಿ ಕುಸುಮಾ ಆಯಿರಹಳ್ಳಿ ಕಾರ್ಯಕ್ರಮ ನಿರೂಪಿಸಿದರು.
ಗಾಂಧೀಜಿಯವರ ತತ್ವಗಳು, ಪ್ರಜಾಪ್ರಭುತ್ವದಲ್ಲಿ ಪ್ರಶ್ನಿಸುವ ಮನೋಭಾವದ ಮಹತ್ವ, ಪತ್ರಿಕೋದ್ಯಮದ ಸಾಮಾಜಿಕ ಹೊಣೆಗಾರಿಕೆ ಹಾಗೂ ಬರವಣಿಗೆಯ ನೈತಿಕ ಮೌಲ್ಯಗಳ ಕುರಿತು ನಡೆದ ಸಂವಾದ ಕಾರ್ಯಕ್ರಮವು ಚಿಂತನಶೀಲ ಚರ್ಚೆಗೆ ವೇದಿಕೆಯಾಯಿತು.
KEY WORDS:
G.N. Mohan, Mahatma Gandhi, Dear Gandhi book, Gandhi discussion, Mysuru, Mysuru news, Gandhi history, freedom of expression, questioning authority
